खरी सकाळ

फार काही विचित्र नाही,

पण परवा एक प्रकार घडला

भल्या सकाळी एक कुत्रा

‘वासुदेवा’वर भुंकताना पाहिला

मी थोडा बिचकलो,

आश्चर्यानं पहात राहिलो

‘रोजचंच आहे’ असं म्हणून

वासुदेव शांत हसला

पुढे होऊन मी थोडंसं चुचकारलं,

तेवढ्यापुरतं थोपटलं

आजचा मॉडर्न कुत्रा तो,

थोड्या आमिषानं शांत बसला

वासुदेवाचा वेष पारंपारिक,

कुत्र्याला स्वेटर घातलेला

पेहरावातल्या फरकालाच विषमता समजून

बहुधा तो भुंकू लागलेला

आल्यासारखा वासुदेव

त्याच्या वाटे निघून गेला

मी कुत्र्याकडे

नि कुत्रा त्याच्याकडे बघत राहिला

उगवतीचा मंत्र गात जाणारा

पाठमोरा वासुदेव

‘मित्रांनो, ‘खरी’ सकाळ ही अशी असते’

एवढं मात्र सांगत राहिला

फार काही विचित्र नाही,

पण अगदी परवाच हा प्रकार घडला...

-अभिजित