खरी सकाळ

फार काही विचित्र नाही,

पण परवा एक प्रकार घडला

भल्या सकाळी एक कुत्रा

‘वासुदेवा’वर भुंकताना पाहिला

मी थोडा बिचकलो,

आश्चर्यानं पहात राहिलो

‘रोजचंच आहे’ असं म्हणून

वासुदेव शांत हसला

पुढे होऊन मी थोडंसं चुचकारलं,

तेवढ्यापुरतं थोपटलं

आजचा मॉडर्न कुत्रा तो,

थोड्या आमिषानं शांत बसला

वासुदेवाचा वेष पारंपारिक,

कुत्र्याला स्वेटर घातलेला

पेहरावातल्या फरकालाच विषमता समजून

बहुधा तो भुंकू लागलेला

आल्यासारखा वासुदेव

त्याच्या वाटे निघून गेला

मी कुत्र्याकडे

नि कुत्रा त्याच्याकडे बघत राहिला

उगवतीचा मंत्र गात जाणारा

पाठमोरा वासुदेव

‘मित्रांनो, ‘खरी’ सकाळ ही अशी असते’

एवढं मात्र सांगत राहिला

फार काही विचित्र नाही,

पण अगदी परवाच हा प्रकार घडला...

-अभिजित

मी अजून जिवंत आहे...

I hope तुला माहित्ये

की मी अजून जिवंत आहे...

नुसताच ‘जिवंत’ आहे की खरंच ‘जगतोय’

हा प्रश्न मात्र ज्वलंत आहे

I hope तुला माहित्ये

की मी अजून जिवंत आहे...

प्रेमाचा ओलावा होता जिथे

तिथे आता टिपूसही दिसत नाही

खरंतर प्रेम म्हणावं की नुसतीच ओढ

तेच आता कळत नाही

पण कोरडेपण दिसलं जरी

रखरखाट असला जरी वरवर

तरी आत खोल कुठेतरी

कधीतरी फुललेला वसंत आहे

I hope तुला माहित्ये

की मी अजून जिवंत आहे...

आठवणींचा अल्बम चाळला जातोच

सोबतीत सरलेला प्रत्येक क्षण दिसत जातो लख्ख

आनंदही तितकाच होतो

नि तितकंच होतं दु:ख

त्या दु:खापेक्षा, अर्थातच मला

आनंद जास्त पसंत आहे

I hope तुला माहित्ये

की मी अजून जिवंत आहे...

तिकडे तू आणि इकडे मी

दोन ध्रुवांवर असल्याची होते जाणीव

म्हटलं तर दोघे परिपूर्ण

तरीही कसलीशी जाणवते उणीव

पण हल्ली मीही असतो बिझी

आणि तुला तरी कुठे उसंत आहे...

But I hope तुला माहित्ये

की मी अजून तरी जिवंत आहे...

नुसताच ‘जिवंत’ आहे की खरंच ‘जगतोय’

हा प्रश्न मात्र ज्वलंत आहे...

I hope तुला माहित्ये

की मी अजून जिवंत आहे

- अभिजित भागवत